കൈരളി ടി വി സന്നദ്ധ സേവന പുരസ്‌കാരം ഡോ. ടി മനോജ് കുമാറിന്

ആതുരശുശ്രൂഷാ രംഗത്ത് വ്യക്തിമുദ്ര പതിപ്പിച്ച പ്രതിഭകള്‍ക്ക് ആദരമായി നല്‍കുന്ന കൈരളി ടി വി ഡോക്ടേഴ്‌സ് പുരസ്കാരത്തിൽ സന്നദ്ധ സേവന മേഖലയിലെ മികച്ച ഡോക്ടർക്കുള്ള പുരസ്കാരം ഡോ. ടി മനോജ് കുമാറിന്(MD, MRC Psych. Clinical Director, Mental Health Action Trust, Kozhikode) ലഭിച്ചു.

മാനസിക വെല്ലുവിളി നേരിടുന്നവര്‍ക്ക് സാന്ത്വനചികിത്സ എന്ന പുതിയ സങ്കല്‍പം കണ്ടെത്തുകയും പാവങ്ങള്‍ക്ക് ആ സേവനം സൗജന്യമായി നല്‍കുന്ന സേവകനാണ് ഡോ. ടി മനോജ് കുമാര്‍. ആ നിശ്ശബ്ദ സേവനം ഒന്നരപ്പതിറ്റാണ്ടകളായി തുടരുന്നു. ബ്രിട്ടണില്‍ 15 വര്‍ഷം ജോലി ചെയ്ത ശേഷമാണ് അദ്ദേഹം നാട്ടിലെത്തുന്നതും മാനസിക വെല്ലുവിളി നേരിടുന്നവര്‍ക്ക് തണലാവുകയും ചെയ്‍തത്.

അദ്ദേഹം കോഴിക്കോട്ട് തുടങ്ങിയ ‘മെന്റല്‍ ഹെല്‍ത്ത് ആക്ഷന്‍ ട്രസ്റ്റ്’ ‘എം ഹാറ്റ്’ ഇന്നൊരു പ്രസ്ഥാനമാണ്. കേരളത്തിലെ 11 ജില്ലകളിലും സാന്നിധ്യം, 70-ഓളം ക്ലിനിക്കുകള്‍, അഞ്ചു ഡോക്ടര്‍മാര്‍, 65 ആരോഗ്യപ്രവര്‍ത്തകര്‍, ആയിരത്തോളം സന്നദ്ധപ്രവര്‍ത്തകര്‍. മാനസികവെല്ലുവിളി നേരിടുന്ന 6,500-ലേറെ പാവങ്ങള്‍ക്ക് ‘എം ഹാറ്റ്’ സേവനമെത്തിച്ചു കഴിഞ്ഞു. കേവല സാന്ത്വന ചികിത്സയല്ല മനോജ് ഡോക്ടറുടെ രീതി. മരുന്നുചികിത്സയുണ്ട്, കൗണ്‍സലിംഗുണ്ട്, പുനരധിവസിപ്പിക്കലുണ്ട്. മാനസിക വെല്ലുവിളിനേരിടുന്നവര്‍ക്കുള്ള സമഗ്രപരിചരണമാണത്. സ്ത്രീകള്‍ക്കും ആദിവാസികള്‍ക്കും വേറിട്ട പരിഗണന അതിന്റെ മറ്റൊരു തലം. ഒരു കൊല്ലം ഒരു കോടി രൂപയുടെ സേവനം നല്‍കുന്നു. അതിനുള്ള പണം സാമൂഹികസേവന സംഘടനകളിലും വ്യക്തികളിലും നിന്ന് കണ്ടെത്തുന്നു.പ്രൈമറി ഹെല്‍ത്ത് സെന്ററുകളെയും പാലിയേറ്റീവ് കെയര്‍ സംവിധാനത്തെയും ഉപയോഗിച്ചാണ് എം ഹാറ്റ് മുന്നോട്ടുപോകുന്നത്.

നെടുമ്പുരാക്കൽ കിഴക്കേ പിഷാരത്ത് പരേതനായ മാധവ പിഷാരോടി(റിട്ട. ഡിസ്ട്രിക്ട് ജഡ്ജ്)യുടെയും ത്യശൂർ പടിഞ്ഞാറേ തൊണ്ണങ്ങാമത്ത് പരേതയായ സുഭദ്ര പിഷാരസ്യാരുടെയും മകനാണ്. ഭാര്യ: ഡോ. രമണി മനോജ് കുമാർ.

ഡോ. മനോജ് കുമാറിന് പിഷാരോടി സമാജത്തിന്റെയും വെബ് സൈറ്റിന്റേയും തുളസീദളത്തിന്റെയും അഭിനന്ദനങ്ങൾ !